Saut tanya ke suah ditanya senentang Hak Minta Penerang tauka disebut orang Right to Information (RTI)
Hak minta penerang tauka (RTI) tu dikumbai asas hak pendiau mensia baruh Artikel 19 bagi Universal Declaration of Human Rights (UDHR). Ia madah ka “Tiap iku bebas mantai ka buah runding enggau asai ati; tu nyengkaum bebas mantai ka buah penemu nadai bisi kacau sereta ngiga, nerima sereta madah ka penerang enggau idea nengah media sereta nadai ngira sempadan.”
RTI nitihkah atur ka enda tau enda bisi, iya nya semua penerang ti dipegai perintah tauka opis-opis perintah dalam prinsip tau dikembuan bala maioh, semina iya ulih ditagang tauka enda dipadah enti bisi kebuah endar, baka nyaga pengelikun menua tauka pekara dikelalai kediri empu.
RTI tu deka meransang mensia maioh begiga tauka betanya ka penerang ti silik enda ngira ari perintah tauka gerempung bala maioh sereta nanya ke dokumen perintah lalu patut bisi ngembuan salinan diri empu.
Dalam antarabansa, nyentuk ngagai bulan lima (Mei) 2019, sepemayuh 129 bengkah menua bisi undang-undang RTI tu. Sweden nyadi menua keterubah ngembuan undang-undang Hak Minta Penerang ari taun 1766. 200 taun sepengudahnya dalam taun 1966, menua besai Amerika Syarikat mega numbuhka undang-undang tu.
Bak menua Asia Tenggara, 5 buah negara bisi ngembuan undang-undang RTI: Thailand (1997), Indonesia (2008), Vietnam, Philippines and Timor-Leste numbuhka undang-undang tu dalam taun 2016.
Akses agi penerang ianya ulih ngiga, nerima sereta bekunsi ka penerang tauka penemu.
Penerang ti bebas ianya tiap iku orang bebas nerima, ngena sereta penerang ngagai bala maioh ti diatur perintah enggau pemesai.
Hak Minta Penerang mensia maioh patut bisi pemendar tauka hak dalam beempu penemu tauka penerang menua tu termasuk perintah nitih ke atur akses ngagai penerang atur pengawa dalam hak pendiau mensia. Enggau nyak perintah menua tu patut nentuka mensia maioh bisi akses ngagai penemu tauka penerang ti digaga bala pemesai, atur tu semina ulih ditagang enggau alasan ti sah baka kena nyaga pengelikun menua tauka mai penusah ngagai mensia maioh.
Bak Malaysia, hak minta penerang tu enda entu nyentuk dalam undang-undang tang suah dikena dalam Perkara 10, Konstitusyen Perintah Besai ti madah hak mantai ka penemu enggau asai ati, bejaku serta pengawa gelumu.
Taja piak, bak Selangor enggau Penang, perintah nengeri tu ngembuan sereta ngenan ka atur asas ngagai hak minta penerang, tajapan bisi takat bak siti-siti nengeri.
- Penerit adat Selangor numbuhka enakmen Penerang ti bebas (FOI) dalam bulan lapan (Ogos) 2011. Tekan ditu penerang ti silik.
- Penerit adat Penang numbuhka enakmen Penerang ti bebas (FOI) dalam bulan dua (Februari) 2012 lalu dipejalai dalam bulan satu (Januari) 2015. Tekan ditu penerang ti silik.
Akta Rahsia menua tu sereta undang-undang bukai baka Kanun Keseksaan, seksyen 203A kanun keseksaan ti enda ngemendar mansutka penerang ngagai sida ke gawa perintah ngagai mensia maioh balat mangka atur adat tu.
Hak minta penerang tu bejurai ke hak sereta ia nyadi atur pengawa ti paling beguna bendar dalam semua kebebasan ke bukai laban kitai beguna ka penemu tauka penerang sebedau ngaga pemutus ngambika perintah menua tu lebih ransing bejalai ka tanggungpengawa dalam pemutus ke atur sida ea. Atur senentang penerang tu baka hak kitai ke pemeresi rampa menua enggau pengerai, hak ke peneka mantai ka asai ati, hak pengelikun tempat kerja, hak ngulih gaji ti patut enggau hak ke bukai.
RTI tu meransang mensia maioh mansut ka langgur penemu dalam isu ti bekaul enggau kitai empu. Berindik ari nya, enggau penerang ti chukup, kitai ulih terlibat enggau aktif dalam pengawa ngaga pemutus di bisi kaul enggau orang maioh. Tu mega siti atur ti manah kena mantai ke chara pemerintahan ti enda lurus nengah chara berkelakar tauka berandau penemu ti beguna. Hak minta penerang mega menyumbang ngagai perintah lebih terbuka enggau lebih akauntabiliti, lalu nyadi instrumen ti paling beguna kena nyeliah sereta ngelaban penyalah makai suap enggau enda sama rata.
Enggau nyak, RTI deka cakah agi meransang enggau sama rata semua gerup sosial termasuk orang indu enggau Orang Asal. Atur tu mega bekait enggau fungsi pasaran ti manah, ngangkatmanah dalam pelaburan iklim serta keberkesanan dalam bantu pemansang.
Nyadi, enggau RTI tu patut bisi dalam semua aspek ngemanahka agi pemansang baka dalam sivil, politik, ekonomi, sosial serta budaya kitai.
Penerang ti dikembuan bala pemesai ti sepatut ya ditemu tauka dipadah ngagai bala mayuh.
Nyadi, perintah patut bepegai bak prinsip bepadah ti maksimum serta proaktif. Kitai patut berubah ari budaya berahsia ngagai tebuka serta telus. Atur tu perlu komitmen ari perintah besai numbuh ka undang-undang ti ulih ngemansut ka rejim penerang ke lebih progresif.
Ulih. RTI enda mutlak sereta ulih ditagang ngena alasan betatak enggau kena ngenan serta nyaga pengelikun bala maioh.
Perintah sereta bala pemesai ti bekuasa mesti meri kebuah nama ea enda bepadah ke penerang ke bisi. Penerang tauka penemu enda tau disekat ketegal ngemaluka ari segi politik tauka laban ketegal irau bala maioh tau bekalih runding agi perintah.
Dalam masa ti chukup mencabar diatu kelebih agi kitai benung dituntung penusah igi penyakit pandemik COVID 19, bisi akses ngagai penerang ti ulih diarap wenggau jampat, penerang ti betul sereta sah ulih mantu bala maioh ngambi ka bala nemu pasal isu ke bekaul enggau sida. Bala maioh bisi hak deka nemu bak sapa sida patut betanya enggau silik, bakani kak akses dalam agi penerang enti bisi tanya saut ti silik senentang sekeda pekara ti bisi dalam laman rama rasmi tauka dalam berita.
Atur tu beguna bendar ngagai bala maioh nyema opis-opis pemesai ngeluarka penerang enggau jampat sereta tau dipechaya nengah cara ti telus enggau terbuka. Siti chunto ke tau dipeda baru-baru tu ianya bejadilaman rama CovidNOW ulih Menteri Pengerai. Mensia maioh deka pechaya ke perintah ketegal bekunsi ke data nengah cara tebuka. Pengawa bakatu mega tau ngenatai ke pemanah ngagai cara sereta servis olih opis-opis perintah ti bukai tauka sida swasta.
Sekeda ari chunto ke bukai ianya komuniti endang patut bulih akses ngagai penerang ti patut baka ripot nyelidik pangka agi rampa menua tauka disebut urang Environmental Impact Assessment (EIA) ti dikena mai pemansang bak endur ti semak sida diau. Pekara tu beguna amat ngagai komuniti dikena sida ea ngatur jalai pengawa ti patut dikereja.
Mensia maioh deka bulih penemu ti betul pasal isu tauka situasi sereta ulih ngatur diri sida enggau manah kena ngaga pemutus ti meruan laban ulih ngangkatmanah semua pengawa lebuh maya bisi polisi, undang-undang tauka projek infrastruktur ti bekaul enggau sida enti nyema sida dilengkap enggau penerang ti chukup.
Tu mega beguna ngagai mensia maioh kena sida nambah ke kemahiran literasi pasal penerang. Peranak menua ti bepenemu pasal penerang ulih mida antara penerang sereta penerang ti salah, enggau ulih mida ke penerang ti patut tebuka bebanding enggau penerang di enda patut ditemu.
Dalam mai budaya telus enggau tebuka, menua tu patut nitih ka atur ti tau ngasuh sereta ngelindung hak kitai dikena bepintaka penerang nyengkaum numbuh ka undang-undang RTI:
Tebuka ari pun
Penerang ari perintah patut nyadi penerang ditemu umum. Kitai deka bulih akses ngagau semua penerang, tang tau enda dipadah semina enti bisi alasan ti kukuh.
Mansut ka penerang enggau lengkas serta proaktif
Perintah patut nengah chara ti proaktif mansut ke semua penerang bak laman rama enggau patut merati penerang nyak ti pemadu baru sereta ulih di akses enggau muntang. Enggau nyak, mensia maioh ulih akses penerang enggau lengkas lebuh maya beguna sereta nitih ka penyuah peminta tauka nitih pemanah perintah enti penerang nyak patut dipadah tauka dipansut.
Dipejalai ka ajensi bebas
Perintah enda patut megai pengawa tu sereta ngaga pemutus kepenudi senentang pekara ke patut ditemu bala maioh enggau bakani chara kitai tau ngulih ka penerang nyak. Siti ajensi bebas patut ditumbuhka ngambi proses enggau prosedur ti patut disedia kena nyamin akses penerang ke bekaul sereta penting ngagai mensia maioh.
Ngangkat ka perintah tebuka
Orang gawa perintah patut dilatih enggau budaya madah ke penerang ngagai bala maioh ukai nagang sida ari ngulih ke penerang.
Pekara dikelaung
Beberapa pekara ulih ditagang sereta enda tau dipansut, baka data peribadi enggau penerang ti tau nyeruga pengelikun menua. Ngembuan alasan ti sah, patut sereta bekadar enti nagang mansut ka penerang. Senarai ti ditagang patut dipadah enggau silik dalam perundangan sereta tafsiran enda tau peneka ati kelalu besai enggau tebuka.
Siti ujian patut dipejalai kena ngelindung mensia maioh sebedau nyekat tauka ngenggai ka akses agi penerang.
Ungkus
Mensia maioh enda patut diasuh mayar data tauka penerang ti dipegai opis pemesai. Sebarang ungkus patut enda mar sereta bepanggai kena nampung pengawa ke patut baka ngaga salin enggau cetak.
Mengkaji undang-undang bukai
Semakan lengkap patut digaga sereta pindaan bak undang-undang tauka peruntukan ti ulih nagang RTI. Kajian tu ngambika pengawa bejalai ka RTI enda ditagang olih undang-undang ke udah bisi.
Nyaga sereta ngelindung barang sapa ngeripot
Enti nyema nuan ngelapor pengawa makai suap, nuan patut diberi upah, ukai diukum tauka dipindah ngagai tempat ke jauh agi.
